Yasaq etilgenler cedveline kirgen teşkilâtlar Rusiye territoriyasında yaşağan halqlarnıñ öz muqadderatını tayin etüv meselelerinen oğraşa. Olarnıñ arasında "Rusiye tamır halqlarınıñ halqara komiteti", "Aborigen Forum", "Burâtiya halqınıñ kongressi", "Azat milletler ligası" ve ilâhre.
Rusiye tamır halqlarınıñ halqara komiteti halqara, cemaat teşkilâtlarını, ükümetlerara, ilmiy ve uquq qorçalayıcı organlarnı, şu cümleden BMT, Avropa Şurası ve Arktika şurasını Rusiye Adalet nazirliginiñ bu qararını takbih etmege çağırdı.
"Rusiye tarafından tamır halq institutlarınıñ yoq etilmesi yañı bir şey degil ve Ukrayinanıñ vaqtınca işğal etilgen Qırım territoriyasında ögrenildi. Çünki Meclis — qırımtatar halqınıñ saylanğan temsil organı — daa 2016 senesi ekstremist teşkilât olaraq tanıldı", — dep yazdı Facebook saifesinde BMT tamır halqlar forumınıñ daimiy azası Suleyman Mamutov.
QırımSOS qayd etkeni kibi, tarihiy olaraq Qırım yarımadasında üç tamır halq peyda oldı: qırımtatarlar, qaraylar ve qırımçaqlar. Tamır halqlarnıñ aqlarını qorçalağan teşkilâtlarnı "ekstremist" teşkilâtlar olaraq tanıp, Rusiye akimiyeti ilhaq etilgen Qırım sakinlerini bir etnik gruppağa mensüp olğanları içün taqip etmek içün qanunlarnı azırlay. Bu tamır halqlarnıñ medeniy, diniy ve içtimaiy faaliyetlerini sıñırlay, olarnıñ aq ve serbestliklerini boza.
"Tamır halqlar meselelerinen oğraşqan teşkilâtlarnıñ azaları ve liderleri ekstremist faaliyetinde qabaatlanıp, qanunsız tintüv ve yaqalavlar, qabaatlav mahkemeleri ve uzun apis cezalarına oğratıla bile. Bu sebepten insanlar yarımadanı terk etmege mecburlar", — dep qayd ettiler teşkilâtta.
Er yıl avgustnıñ 9-nda Dünya tamır halqlarınıñ halqara künü qayd etile. Ukrayina prezidenti Volodımır Zelenskıy 2021 senesi iyülniñ 21-nde Ukrayina tamır halqları aqqında No1616-IX qanunnı imzaladı, onı Yuqarı Rada 2021 senesi iyülniñ 1-nde qabul etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
