Rusiye Adliye nazirligi istenilmegen teşkilâtlar cedveline ukrayin arbiylerine yardım etken "Sağ qayt" fondunı, ükümetke bağlı olmağan Freedom House Amerika teşkilâtını ve Kareliya mustaqilligi içün areket etken Stop Occupation of Karelia teşkilâtını kirsetti.
Freedom House 1941 senesi qurulğan edi. Teşkilât 40 yıldan berli bütün dünyada siyasiy ve grajdan serbestliginiñ vaziyetini tedqiq ete.
Rusiye Baş prokuraturası qayd etkenine köre, teşkilât ukrayin ordusına er taraflama yardım köstermege, Ukrayina faydasına "buzlatılğan" Rusiye aktivlerini musadere etmege ve sanktsiyalar basqısını quvetleştirmege çağıra.
"Stop the Occupation of Karelia" Kareliya mustaqilligi areketi 2012 senesi meydanğa ketirildi. Teşkilâtnıñ maqsadı, "ananeviy nordik qıymetlerine" riayet etecek karel, pomor, veps ve diger halqlar içün mustaqil milliy devletniñ qurulmasıdır.
2023 senesi teşkilâtnıñ iştirakçileri Ukrayina İnternatsional legionı terkibinde Vasil Levonen adına Kareliya batalyonını meydanğa ketirmekni ilân ettiler.
"Sağ qayt" 2014 senesi meydanğa ketirgen Ukrayina arbiylerine yardım etken fond. Teşkilât arbiy bölüklerni silâ, naqliyat vastaları, issilik közeticileri ve diger tehnika ile temin ete. Şimdiki vaqıtta Ukrayinada eñ büyük göñülli fondlarından biri sayıla.
"İstenilmegen teşkilâtlar" cedveli Rusiyede 2015 senesinden berli bar. Şimdiki vaqıtta oña 160-tan ziyade qurulış kirsetildi.
Cedvelge kirsetilüvi teşkilâtnıñ memlekette çalışması yasaq etilgenini ve Rusiye vatandaşlarınıñ cinaiy taqip telükesi altında onıñnen işbirligi yapması yasaq etilgenini ifadeley.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
