Rusiye Federatsiyasında 16 yıl apis cezasına maküm etilgen qırımtatar faali ve vatandaş jurnalisti Seyran Saliyev keçken sene boş ayndan berli bulunğan ceza izolâtorından çıqtı. Bu aqta onıñ apayı Mümine haber etti.
"Aqayım Seyran Saliyev Tula vilâyetiniñ 4-nci tüzetüv cezahanesiniñ bölüginden telefon etti. 2024 senesi boş aynıñ 20-nden başlap o, daima ceza izolâtorında tutula edi. Niayet, Ramazan ayınıñ birinci künü onı ŞİZO-dan çıqarıp, keçken sene oraq ayından berli bulunğan sert apishanege qaytardılar", — dep ayttı qadın.
Onıñ aytqanına köre, dört ay devamında qırımlı 12 kilogram azdı. Bu, o, yalıñız apishaneniñ aşlarını aşlağanından oldı, domuz eti musulmanlarğa yasaq olğanı içün aşını saylap aşamaq kerek edi.
Seyran Saliyev Rusiye quvetçileri tarafından 2017 senesi orta küz ayında tutuldı. Onı Rusiyede yasaq etilgen "Hizb ut-Tahrir" teşkilâtınıñ faaliyetinde qabaatladılar. 2020 senesi Rusiye makemesi Saliyevni 16 yılğa üküm etti.
Apiske alınmazdan evel Saliyev ekskursiya reberi olıp çalıştı. Tasil boyunca o, türk ve qırımtatar tilleriniñ filologıdır. Saliyev "Qırım birdemliginiñ" vatandaş jurnalisti edi ve qırımtatarlarnıñ Rusiye akimiyeti tarafından taqip etilüvini aydınlata edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
