Noyabrniñ 21-nde qırımlılar Novoçerkassknıñ 3-nci SİZO-dan çıqarıldı. Başta olarğa, olarnı Volgograd üzerinden Saratov vilâyetine alıp ketecekler, dep ayttılar. Dekabrniñ 9-nda Alim Sufyanov anasına mektübinde, olarnı Volgogradta qabul etmegenlerini bildirdi, ve neticede olarnı Qazanğa yolladılar. Qırımtatarlarnı Permge Qazandan ketirdiler.
Hayredinovnıñ mektübinden onıñ apayı, aqaynı 29-ncı tahqiqat izolâtorına yerleştirgenlerini, Alim Sufyanovnı ise 5-nci tahqiqat izolâtorına yerleştirgenlerini bildi.
"Dörtünci Bağçasaray gruppasınıñ" eki iştirakçisi de bir kişilik kameralarda tutula. Permge olarnı bir afta evel ketirdiler. Seyran Hayredinov mektübinde onı, büyük ihtimalnen, Vladimir apishanesine etap eteceklerini de bildirdi.
"Kamerada özüm oturam, hadimlerniñ maña munasebeti normal. Vladimirge kelgen soñ, körüşüvge ariza yazacağım, tahminen aprel ayında", — dep yazdı mektüpte qırımtataı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Emil Ziyadinov, Zekirya Muratov, İsmet İbragimov, Alim Sufyanov, Seyran Hayredinov, Vadim Bektemirov mahkemede apiske alındı ve Aqmescitniñ ceza izolâtorına qapatıldı. I derece köz saqatı olğan Aleksandr Sizikov ev hapsine yollanıldı. Tutulğanlar Rusiyede yasaqlanğan «Hizb ut-Tahrir» diniy teşkilâtınen alâqaları bar olğanında qabaatlandı.
2023 senesi mayıs ayında Sizikov ilk dört yılnı apishanede keçirecek 17 yılğa üküm etildi. 2024 senesi sentâbrniñ 13-nde Rusiye Federatsiyasınıñ istinaf arbiy mahkemesi qırımlınıñ ükmüni deñiştirmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
