"Qırım musulmanları davası"nıñ figurantı Lenur Seydametov Özbekistanğa ekstraditsiya etile bile. Bu aqta "Qırım birdemligi" onıñ qadını Adjira Seydametovağa atıf etip yaza.
Onıñ aytqanına köre, çeçek ayınıñ 17-nde o, aqayını Rusiye Federatsiyasınıñ Lipetsk vilâyetiniñ Yelts apishanesinde ziyaret etken edi. Bundan soñra, apis müddeti soñuna kelgeni içün, onı koloniyağa yollamaq kerek ediler.
Çeçek ayınıñ 23-nde erkek, qorantasına onı Amur vilâyetine alıp ketkenlerini bildirgen. "Men sabırnen barıp yetkeni aqqında haber etecegini bekledim. Bugün (çeçek ayınıñ 28-nde) maña ondan mektüp keldi, o, Voronejde, 1-nci SİZO-da buluna, ve... Özbekistanğa ekstraditsiya meselesi peyda oldı", — dep yazdı qırımlınıñ qadını.
"Aqayım ve men şaşmaladıq, ne ola? Bu kimniñ areketleri? FSİN? Yoqsa başqa bir qurulışlar? Vaziyet añlaşılmay. Şimdi ne olacağı belli degil, ve onı ne yerge avuştıracaqlar? On yıldan ziyade Lenur Qırımda yaşay edi, [ukrayin] yaşayış izni ve qayd etilgen evliliknen. O, qırımtatar, musulman. Qırımdan siyasiy mabüslerniñ mecburiy çıqarılması qanunsız bir qarar", — dep qayd etti qadın.
Apayına yazğan mektübinde Lenur Seydametov, FSİN hadimleri oña "ne olğanını" añlatmaylar, dep qayd etti.
Lenur Seydametov 1986 senesi Özbekistannıñ Samarqand vilâyetiniñ Bulungur şeerinde doğdı. 2012 senesi Qırımğa ⁇ sürgün etilgen ecdatlarınıñ toprağına qaytıp kelgen.
2021 senesi kiçik aynıñ 17-nde Qarasuvbazar, Bağçasaray, Aqmescit, Aqyar şeerlerinde ve Qırımnıñ İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov olarnıñ evlerinde tahqiqat tedbirleri keçirilgen soñ, FSBniñ Qırım idaresine ketirildi.
Qırımtatarlar Rusiyede yasaqlanğan, amma Ukrayina ve dünyanıñ bir çoq memleketinde milliy qanunlar seviyesinde sıñırsız areket etken "Hizb ut-Tahrir" diniy teşkilâtınıñ faaliyetine qoşulğanlarında qabaatlandı.
2022 senesi oraq ayında Rostov-na-Donu şeeriniñ Cenübiy okrugınıñ mahkemesi "Qırım musulmanları davasında" üç qırımtatar faali Oleg Fedorov, İsmet ve Ernest İbragimovlarğa üküm çıqardı.
Ernest İbragimov ve Oleg Fedorov sert rejimli koloniyasında 13 yıl qalmalarına üküm etildi. Bulardan 3,5 yıl apishanede qalacaqlar. Azat etilgen soñ sıñırlavlar 1 yıl devam etecek. İsmet İbragimov ise 19 yılğa üküm etildi.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
