"Qırım musulmanları davası"nıñ figurantı, siyasiy mabüs Muslim Aliyev, musulmanlar içün mecburiy beş kere namaz qılğanı içün ceza izolâtorınıñ bir kişilik kamerasına 15 künge yerleştirildi. Bu aqta o qorantasına mektüpte bildirdi, dep haber ete "Qırım birdemligi".
Aliyevniñ aytqanına köre, namaz vaqtında kamerağa başı kirdi. Onıñ içün Qırım musulmanı onı selâmlap olamadı. Bu sebepten memuriyet onı 2024 senesi dekabrniñ 27-ne qadar ceza izolâtorına yolladı.
Aliyev 2016 senesi apiske alındı. FSB onı "Hizb ut-Tahrir" islâm siyasiy firqasınıñ faaliyetinde qabaatladı. Teşkilât 2003 senesinden berli Rusiyede yasaq etilgen, amma Ukrayinada qanuniy şekilde faaliyet köstergen edi.
2019 senesi iyülniñ 18-nde Avropa parlamenti Rusiyeni bütün ukrayinalı siyasiy mabüslerni, şu cümleden bu cinaiy davanıñ mabüslerini azat etmege çağıra.
2019 senesi Aliyev Rusiye mahkemesi tarafından 19 yılğa azatlıqtan marum etildi. "Memorial" aq qorçalayıcı merkezi beş qırımlını siyasiy mabüs olaraq tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
