Rusiyede "Qırım musulmanları davası" boyunca mahküm etilgen Server Zekiriyayevni Rusiyeniñ Tula vilâyetindeki 1-nci tüzetüv koloniyasında işkencege oğratalar. Bu aqta onıñ ömür arqadaşı Zarema Zekiriyayeva bildirdi ve dünya toplulığını aqayına yapılğan eziyetlerni toqtatmağa çağırdı.
"O, 24 saat devamında lagerniñ kanalizatsiya sistemasından çıqqan gazlarnen nefes ala. O, eñ çoq geceleri azaplana. Dört künden berli yuqusız qala: boynunıñ limfa noqtaları inkişaf ete, qoqusı ve oksigen yetmezligi sebebinden boğula. O, artıq maneviy ve fizikiy zarar kördi", — dep yazdı Zarema Facebook saifesinde.
O şunı da bildirdi ki, 2024 senesi iyünniñ 11-nde Zekiriyayev kamerağa kirmege red etti ve normal tutuv şaraitlerini istedi. Zaremanıñ aytqanına köre, böyle ricadan soñ oña Rusiye quvetçileriniñ taqımı çağırıldı ve qorquzmağa başladılar.
2024 senesi iyülniñ 9-nda o, bütün kamerağa bağırıp başladı: "Ne içün meni işkencege oğratasıñız, amma hadimler qollarını köterip, "bilmeymiz" ya da "dua et, biz saña yardım etip olamaymız" deyler", — dep paylaştı Zarema.
Zarema Rusiyeniñ çeşit organlarına şikâyet etken soñ, Rusiye memurları "Serverde er şey yahşı ve anda bulunmaq içün şaraitler uyğun" dep yazğanlar.
2017 senesi oktâbr ayında Rusiye quvetçileri Bağçasaraynıñ altı sakinini yaqaladı. Bu Timur İbragimov, Marlen Asanov, Memet Belâlov, Seyran Saliyev, Server Zekiriyayev ve Ernes Ametov. Rusiye FSB-si onı Rusiyede yasaq etilgen ve Qırım tarafından ilhaq etilgen "Hizb ut-Tahrir" teşkilâtında iştirak etkeninde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2020 senesi sentâbr ayında Bağçasaraydaki ekinci "Hizb ut-Tahrir davası" boyunca üküm çıqardı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
