Ekinci Bağçasaray "Hizb ut-Tahrir" davasınıñ mabüsi, qırımtatar Seyran Saliyevge daa sert ceza berdiler, dep haber ete ZMINA uquq qoruyıcı merkezi.
Yılnıñ başından berli erkekni bir qaç kere ceza izolâtorına (ŞİZO) yolldılar. Er seferinde 15 künlik apis cezasını çekti.
Aq qorçalayıcılar qayd eteler ki, bir kişi bir qaç kere SİZOğa yollanılsa, koloniyada onı "qorqunçlı bozuvcı" dep sayalar.
Uququ qoruyıcı, siyasiy mabüs Mümine Saliyevanıñ apayı, şimdi ailesine telefon açmaq içün aqayı yañı arizalar yazmalı ve apishaneniñ memuriyetiniñ razılığını beklemeli, dep tarif etti.
Bundan da ğayrı, oña endi yılda üç degil, eki kere uzun müddetli körüşüvlerge barmağa izin berildi.
2017 senesi oktâbr ayında Rusiye quvetçileri Bağçasaraynıñ altı sakinini yaqaladı. Bu Timur İbragimov, Marlen Asanov, Memet Belâlov, Seyran Saliyev, Server Zekiriyev ve Ernes Ametov.
Rusiye FSB-si onı Rusiyede ve işğal etilgen Qırımda yasaq etilgen "Hizb ut-Tahrir" teşkilâtında iştirak etkeninde qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2020 senesi sentâbr ayında Bağçasaraydaki ekinci "Hizb ut-Tahrir davası" boyunca üküm çıqardı.
Apiske alınğanına qadar Saliyev ekskursiya rehberi olıp çalıştı. Tasil boyunca o, türk ve qırımtatar tilleriniñ filologıdır. Saliyev "Qırım birdemliginiñ" vatandaş jurnalisti olıp, Rusiyeniñ qırımtatarlarğa qarşı repressiyalarını aydınlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
