"Qırım musulmanları davası"nıñ figurantı Vadim Bektemirov Rusiye Federatsiyasınıñ cezahanesinde gipertonik krizizten azap çeke eken. Em de ağır şaraitlerde bulunğanı içün körmesi de fenalaşqan. Bu aqta Qırımtatar resurs merkezi qırımlınıñ tuvğanlarına atıf etip bildire.
"SİZO ve apishanedeki şaraitlerden sebep dayanılmaz baş ağrıları ola", — dep qayd ete soy-sopları.
Tuvğanları Bektemirovğa ilâc ve vitaminler yollay, çünki cezahanede oña adetince iç bir şey bermeyler.
QRM qayd etkenine köre, Bektemirov tek tış dünyadan degil de, yaqınlarından da ayırılıp qala, çünki SİZO-da körüşüvler yasaq etile eken. Yaqınlarda tuvğanları qırımtatarğa Quran yollağanlar, cezahede ise o ondan tutıp alınğan.
2022 senesi fevralniñ 11-nde "Qırım musulmanları davasınıñ" mabüsi Vadim Bektemirovnı Rusiyeniñ Rostov-na-Donu Cenübiy okrugınıñ arbiy mahkemesi 11 yıl sert rejimli koloniyada qalmasına üküm etti.
2023 senesi aprel ayında Rusiyeniñ Vlasiha şeerindeki istinaf arbiy mahkemesi Bektemirovnıñ ükmüni deñiştirmedi. Advokat mahkeme oturışuvında cinaiy davanıñ deliller bazası aqsızlıqnen toplanğanını iddia etse de.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
