Haber etilgenine köre, tuvğanlarına cezahaneden etap aqqında resmiy cevap alâ daa berilmedi.
Qırımtatarnıñ ömür arqadaşı Gülnara Adilovanıñ aytqanına köre, etapqa azırlıq aqqında onıñ aqayı avgustnıñ 23-nde haber etti. O, onı ne yerge yollağanlarını bilmey, dep qayd etti. Bir qaç künden soñ, avgustnıñ 27-nde, Adilov Kızıl şeerindeki 1-nci SİZO-dan temyiz şikâyet boyunca oturışuvda iştirak etti. Bu oturışuvdan soñ ondan iç bir haber yoq edi.
Sentâbr ayınıñ başında Gülnara Adilova Qızıl rayonınıñ 1-inci prokuraturasına mektüpler yazıp başladı, Cezalarnı yerine ketirüv federal hızmetiniñ qabul ve nevbetçi bölügine telefon etti, amma aqayınıñ koloniyağa ketirilgenine dair resmiy bir de bir malümat almadı.
Tek oktâbrniñ 23-nde qoranta qırımtatarınıñ bulunğan yerini bildi. O, qızına qısqa mektüp yazıp, niayet koloniyağa avuştırılğanını haber etti.
Onıñ aytqanına köre, aqayını qıdıruv vaqtında o, insan aqları cumhuriyet ombudsmenine, prokuraturağa ariza yollağan edi, amma ne adiy, ne de elektron mektüplernen kimse cevap bermedi. Bu basamaq aqqında resmiy tasdıqlamalar, şu cümleden Moskvadan da, yollanılmadı.
Mektüpni alğan soñ qoranta Bilâl Adilovğa cevap yolladı. Amma onı alğan-almağanı belli degil.
Bilâl Adilov — qırımtatar faali, altı balanıñ babası, diniy erbap. Apiske alınmazdan evel bir qaç yıl devamında qırımtatar halqınıñ cemaat ayatında faal iştirak etti, mahkemelerge, tintüvlerge bardı, siyasiy mabüslerniñ qorantalarına yardım etti.
2019 senesi mart ayınıñ soñunda uquq qoruyıcılar Qırım musulmanları Tofik Abdülgaziyev, Mecit Abdurahmanov, Vladlen Abdülkadırov, İzet Abdullayev ve Bilâl Adilovnı yaqaladılar. Bu künü FSB hadimleri bir kereden Qırımnıñ 25-ten ziyade sakininiñ evinde tintüv keçirdi. Bu soñki on yıl içinde qırımtatarlarnıñ evlerinde keçirilgen eñ kütleviy tintüvler oldı.
2022 senesi mayıs ayında Rostov-na-Donunıñ Cenübiy okrugınıñ arbiy mahkemesi ekinci Aqmescit «Hizb ut-Tahrir davasınıñ» mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovnıñ qabaatlayıcı ükümlerini çıqardı. Müddetleri – 12 yıldan 14 yılğa qadar.
"Memorial" aq qorçalayıcı merkezi 2019 senesi martnıñ 27-nde Qırımda tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
