Kiçik aynıñ 13-ne keçken gecesi Rusiye ordusı Odesa vilâyetine ücüm etti, neticede bir insan elâk oldı, daa altı kişi yaralandı, üçü ağır alda buluna. Bu aqta vilâyet arbiy memuriyetiniñ başı Oleğ Kiper bildirdi.
Onıñ aytqanına köre, darbe maqsadı Odesa vilâyetiniñ liman, mesken, sanayı ve energetik infrastruktura obyektleri oldı. Limanda kübre anbarları zararlandı, dört yengil avtomobil ve yük vagonları yandı.
"Odesada UAV parçaları avtosalon ve şifahane territoriyasında tüşti. Eki "Şahed" eki mesken evniñ dairelerine tüşti, yanğın çıqmadı", — dep yazdı Kiper öz telegram kanalında.
Mıkolayiv vilâyetinde saba ücümi neticesinde energetik infrastruktura obyektine zarar ketirildi, Baştan rayonınıñ meskün yerleri yarıqsız qaldı, dep bildirdi Mıkolayiv vilâyeti arbiy memuriyetiniñ yolbaşçısı Vitaliy Kim.
Ukrayina akimiyeti ve halqara teşkilâtlar grajdan infrastruktura ve ealige yapılğan darbelerni Rusiyeniñ arbiy cinayetleri olaraq tanıy, Rusiye akimiyeti ise bunı tanımay ve ücümler arbiy obyektlerge yapılğanını bildire.