Rusiye ordusı Herson vilâyetiniñ Veletenske köyüne ücüm etti, bir qoranta zarar kördi - ana-babası yaralandı, qızları elâk oldı, dep bildire Herson vilâyetiniñ arbiy memuriyeti.
''Ücümge bir qoranta yaşağan mesken ev oğradı. Ana-babası yaralandı, qızları anda elâk oldı. 52 yaşında qadın yaralandı. 77 yaşındaki aqayğa qapalı bir bel-beyin travması ve kontuziyası, 72 yaşındaki apayına ise parçalanğan yaralar diagnozı qoyuldı'', - dep aytıla haberde.
OVA malümatına köre, ekimler zarar körgenlerge qaza yerinde tibbiy yardım kösterdi.
Fevralniñ 10-na keçken gecesi Rusiyeniñ dron ücüminiñ neticesinde Harkivde bir qaç büyük yanğın çıqtı - 15 şahsiy ev yandı. Yerli akimiyetniñ malümatına köre, yedi insan elâk oldı. Baş prokuraturanıñ ofisiniñ malümatına köre, şahsiy evlerden birinde bütün qoranta elâk oldı: aqay, apay ve olarnıñ üç balası: 7 aylıq, 4 ve 7 yaşında oğlanlar. Diger evde 66 yaşında aqay ve 65 yaşında qadın elâk oldılar.
Ukrayina prezidenti Volodımır Zelenskıy yanvarniñ 30-nda bildirdi ki, yılnıñ başından berli Rusiye Ukrayinağa 330-dan ziyade çeşit raketa ve tahminen 600 arbiy uçucısız uçaqnı uçurdı.
Moskva, isbat ve şaatlıqlarğa baqmadan, tam cenk başlağanından berli Ukrayinada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
