Harkivde çeçek ayınıñ 18-nde saba Rusiye raketa darbesiniñ neticesinde zarar körgenlerniñ sayısı 74-ke arttı, bir kişi elâk oldı, dep bildirdi şeer yolbaşçısı İğor Terehov.
"Şimdilik 13 insan şeer hastahanelerine alındı, olardan ekisi bala, dört kişi ağır alda buluna. Ekimler zarar körgenlerge bütün kerekli yardımnı köstere", — dep yazdı telegramda vilâyetniñ arbiy memuriyetiniñ yolbaşçısı Oleğ Sineğubov.
Şeer yolbaşçısı qayd etkenine köre, şeerde dört raketa ücümi qayd etildi.
"İlk malümatqa köre, Harkivge qarşı darbeler kassetalı ballistik raketalarnen endirildi. İşte bu sebepten yıqıluv meydanları pek büyük", — dep yazdı Terehov telegramda.
Terehovnıñ qayd etkenine köre, ilk malümatqa köre, 20-den ziyade çoq qatlı ev ve 30-dan ziyade şahsiy ev zarar kördi.
Rusiye arbiyleri çeşit silâ qullanıp, Ukrayina regionlarına muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
