Rusiye Federatsiyasınıñ Federatsiya Şurasınıñ reberligi dört Ukrayına regionını Rusiyege qabul etüv meselesini baqmaq içün nevbetten tış palata toplaşuvını planlaştırmay, dep bildire.
Rusiye Federatsiyasınıñ Federatsiya Şurasınıñ yolbaşçısı Valentina Matviyenko palata bu meseleni oktâbrniñ 4-nde planlaştırılğan oturışuvda baqmağa azır, dep ayttı. İtibarlı senator Andrey Klişas telegramda «yañı subyektlerniñ Rusiyege qabul etilüvi – bir qaç anayasa akimiyet organınıñ ortaq işini ve neticede Anayasa metniniñ tüzetüvlerini talap etecek anayasa protsedurasıdır», ve «yañı subyektlerni Rusiyege qabul etmek içün anayasa nizamını suniy tezleştirüv» ihtimali yoq, dep yazdı.
Kütleviy haber vastaları öz menbalarına esaslanıp bildirgenine köre, «DNR», «LNR» silâlı gruppirovkaları tarafından kontrol etilgen topraqlarnıñ, Herson ve Zaporijjâ vilâyetleriniñ protsedurası sentâbrniñ 30-nda yekünlene bile, dep haber etken edi – bu künü Rusiye prezidenti Vladimir Putin Rusiye Federal keñeşine muracaat etecek, dep aytıldı. Kreml bunı tasdıqlamadı ve red etti.
Sentâbrniñ 27-si – Rusiye işğal etken Ukrayına topraqlarında keçirilgen sahte referendumlarnıñ soñki künü. Bu «referendumlarnı» çoqusı memleket, Ukrayına qanunsız saya ve qabul etmey. Berilgen malümatqa köre, Herson, Zaporijjâ ve Lugansk vilâyetlerinde rey berüv endi yekünlendi, Donetsk vilâyetinde ise eñ yaqın vaqıtta yekünlenecek. Reylerni sayğan separatist vekilleri ve Rusiye tayin etken işğalci memuriyetlerniñ temsilcileri rey bergenler çoq oldı ve 80-90 fayızı Rusiyege qoşulmaq içün rey berdi, dep bildire. Faal uruşlar olğan Ukrayına vilâyetlerinde rey berüv esnası mustaqil közeticiler tarafından baqılmadı, kerçek raqamlarnı bilmek imkânsız. Soñki neticeler yarın beklenile. Ukrayına, ABD ve diger memleketler rey berüvni avtomatlar altında keçirilgen sahte referendum dep adlandıra. Ğarp memleketleri Rusiyege qarşı yañı sanktsiyalar kirsetecek, dep ayttı.
Separatist ve işğalci memuriyetlerniñ vekilleri eñ yaqın vaqıtta Rusiye prezidenti Vladimir Putinge muracaat etip, 4 Ukrayına vilâyetini Rusiyege qabul etmege rica etecek, dep bildirgen edi. Qırım ve Aqyarnen olğanı kibi olsa, Putin olarnı qabul etüv añlaşmasını imzalaycaq, Rusiye parlamenti ise olarnı tasdıqlaycaq ve yañı federatsiya subyektlerini qabul etüv anayasa qanunını taqdirleycek. Bunıñ içün em Rusiye Federatsiyasınıñ Devlet duması, em Rusiye Federatsiya Şurası toplaşmalı. Rusiye Federatsiyasınıñ Yuqarı palatası oktâbrniñ 4-nde toplaşsa, bu künge qadar ilhaq yekünlenmeycek.
Rusiye vekilleri işğal altındaki topraqlar Rusiyege resmiy şekilde qabul etilgen soñ olarğa bütün Rusiye vesiqaları, şu cümleden nükleer doktrinası tarqalacaq.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
