Aprelniñ 23-ne qadar Rusiyede ve ilhaq etilgen Qırımda cenkke qarşı cinaiy davalarnıñ belli mabüsleriniñ sayısı 900 oldı, dep yaza "OVD-İnfo" uquq qorçalayıcı media leyhası.
Uquq qoruyıcılarnıñ malümatına köre, eñ az 448 insan, umumiy sayınıñ aman-aman yarısı, mahkeme ükümlerini bekley. Bazıları Rusiyeden qaçıp oldı, amma çoqusı SİZO-da tutula. Umumen 261 mabüs SİZO-da, tüzetüv koloniyasında ya da mecburiy tedaviylevde tutula. Eñ azından 21 insan eki yıldan ziyade devam etken cenkte azatlıqqa çıqtı. Eñ azından 43 arbiy dava mabüsi işkencege oğrağanını bildirdi.
OVD-İnfo ayrıca, mabüsler arasında sekiz Ukrayina vatandaşı bar, dep yaza, amma bu yañlış. Leyha bu gruppağa 2023 senesi iyün ayında Qırımdaki Rusiye memuriyetiniñ binasına mavı-sarı boya tökkeninden sebep 15 yıl apis cezasına mahküm etilgen qırımlı Bogdan Zizanı kirsetmedi.
Rusiyeniñ Ukrayinağa istilâsı başlağanından berli arbiy areketlerge qarşı faallerge nisbeten davalar aman-aman er kün açıla. Tahqiqat komitetiniñ 2024 senesi yanvar ayındaki malümatına köre, cenk başlağanından berli arbiy "sahtelik" aqqında 273 cinaiy dava açıldı. Daa 81 cinaiy iş Rusiye ordusını itibardan tüşürüv maddesine istinaden açıldı. "OVD-İnfo" malümatına köre, 2022 senesi mart ayından 2024 senesi yanvar ayına qadar 282 kişi "sahte" ve 177 kişi "diskreditatsiya" davalarınıñ mabüsi oldı.
Daa evel "Qırım esnası" uquq qorçalayıcı teşkilâtı, 2023 senesi Qırımda Rusiye ordusınıñ itibarını tüşürüv davaları boyunca taqiplerniñ orta miqdarı ayda 33 protokolnı teşkil etkenini esapladı. Bir yıl evelsi er ay 22 taqip etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
