Rusiye Federatsiyası Ukrayinağa nevbetiy ücümni başlasa, işğal etilgen Qırımda yañı bir seferberlik dalğası ola bilir. Bunı Qırım uquq qoruyıcı gruppasınıñ yolbaşçısı Olga Skrıpnık Qırım.Aqiqatqa bildirdi.
"Aksönovnıñ özüniñ qayd etkeni kibi: misal olaraq, 30 biñ defin yeri ve tibbiyet müessiselerinde yaralı içün 100 biñ yer. Yani, seferberlik esnası devam etecek. Eger şimdi Rusiye Ukrayinağa nevbetiy ücümni başlasa, Qırımda da seferberlik dalğası olacağını tüşünem", - dedi o.
Yanvarniñ 23-nde Rusiye prezidentiniñ matbuat kâtibi Dmitriy Peskov, "qısmiy" seferberlik çerçivesinde vatandaşlarnıñ arbiy hızmetke celp etilmesi yekünlengenini, amma seferberlik aqqında bazı maddeler quvette qalğanını bildirgen edi.
Bıltır sentâbr ayında Rusiyede lafta qısmiy seferberlik başlandı. Rusiye Federatsiyasınıñ Mudafaa nazirligi bildirgenine köre, 300 biñ insan seferber etilecek edi, amma kütleviy haber vastaları akimiyetniñ millionğa qadar insannı seferber etmege niyeti bar, dep bildirgen edi. Şimdi seferberlik toqtatıldı, amma seferberlik buyruğı çalışmağa devam ete.
Rusiye 2022 senesi fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
