Deñişüv neticesinde Rusiye esirliginden daa 95 ukrayinalı azat etildi, dep tarif etti prezident Volodımır Zelenskıy.
Onıñ aytqanına köre, adamlarımıznı evlerine qaytarmağa devam etemiz. Daa 95 qorçalayıcı Rusiye esirliginden azat etildi. Olar Ukrayina Silâlı quvetleriniñ, Milliy gvardiyasınıñ askerleri, sıñırcılar.
Zelenskıy, deñişimnen oğraşqan taqımğa ve Birleşken Arap Emirliklerine bu azat etüvde aracılıq etkenleri içün minnetdarlığını bildirdi.
Prezident şunı qayd etti: "Ne qadar qıyın olsa da, esirlikte olğan er kesni qıdıramız. Er kesni qaytarmaq kerek".
Ukrayina Koordinatsion ştabınıñ malümatına köre, Rusiye esirliginden azat etilgenler arasında 49 Ukrayina Silâlı quvetleriniñ arbiyi (şe cümleden "ava köprüniñ" iştirakçisi, anda blok etilgen bölüklerge yardım etmek içün "Azovstalge" helikopternen barmağa razı oldı, ve eki Ava quvetlerinden), 21 milliy gvardiyacı, 10 arbiy deñizci, yedi territorial mudafaa quvetlerinden, beş sıñırcı, eki Devlet mahsus naqliyat hızmetinden ve bir göñülli cemaat teşkilâtından qorçalayıcı bar.
İyülniñ 17-nde azat etilgenlerniñ episi erkekler: 88 adiy asker ve serjant, yedi zabit.
"Azat etilgen yigitlerimizden 23 kişi Mariupolni qorçalağan edi (olardan on üçü — Azovstalinıñ qorçalayıcısı), 41 Donetsk yönelişinde cenkleşken edi, doquzı — Lugansk ve Zaporojjâ, üçü - Herson ve Harkiv yönelişinde. Azat etilgen deñizcilerden biri istilâ başlağan vaqıtta Kıyiv vilâyetinde edi ve anda öz köyüni işğalcilerden qorçalamaq içün Makarov TRO erkânına qoşuldı. Yerli cemaatqa gumanitar yardım köstergende, rusiye arbiy hızmetçileri tarafından esir alındı", — dep aytıla Ukrayina Koordinatsion ştabında.
Qaytqan ukrayin askerleriniñ çoqusı yaralanğan ve uzun müddetli tedaviylevni talap etken hronik hastalıqlardan zarar körgenleri belli. Olarnıñ çoqusı 2022 senesinden berli istilâcı memleketniñ esirliginde edi. Azat etilgenler arasında ğayıp olğan sayılğan imayeci de bar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz
