Ukrayına arbiy esirlerge munasebet koordinatsion ştabı sentâbrniñ 21-nde deñişim neticesinden Rusiye esirliginden qaytarılğanlarnıñ cedvelini derc etti.
Esirlikten azat etilgenlerniñ tolu cedveli müessise saytında derc etildi.
Umumen 215 Ukrayına imayecisi azat etildi. Azat etilgenler arasında – «Ukrayına Milliy gvardiyası, Ukrayına arbiy-deñiz quvetleri, Ukrayına silâlı quvetleri, Ukrayına Devlet sıñır hızmeti, territoarial mudafaa, Ukrayına milliy polisi, Ukrayına telükesizlik hızmeti, Devlet gümrük hızmeti ve Devlet mahsus naqliyat hızmetiniñ hadimleri ve eki vatandaş», dep bildirdi ştab.
Rusiye esirliginden azat etilgen Ukrayına arbiyleri arasında – Ukrayına qaramanları Denis Prokopenko («Redis») – «Azov» ayrı otrâdınıñ komandanı, Yevğen Bova – deñiz piyadesi Birinci ayrı batalyonınıñ komandanı, Lev Paşko – «Azov» rotasınıñ komandanı.
«Serğiy Volınskıy («Volına») da esirlikten azat etildi, deñiz piyadesiniñ 36-ncı ayrı brigadasınıñ komandanı vazifelerini eda etken Svâtoslav Palamar, «Azov» polkunıñ askerlernen iş komandanınıñ muavini Denis Şleğa, Dmıtro Vışnevetskıy 12-nci operativ brigadasınıñ komandanı Oleg Homenko, komendant rotasınıñ komandanı, «Azovstal» komandanlığını yapqan Dmıtro Kazatskıy, «Azovstal» foto ve videoları bütün dünyanı dolaşqan üyken asker», – dep qoştı Ukrayına arbiy esirlerge munasebet koordinatsion ştabı.
«Meşur «Quşçıq» («Ptaşka») Katerına Polişçuk evge kete – Ukrayına Milliy gvardiyasınıñ göñülli sağlıq hadimi. Öz yırlarınen o, «Azovstalde» olğan arbiylerniñ cenkâver ruhına destek ola edi. Maryana Mamonova qayta, 30 yaşında arbiy ekim, tibbiy hızmetniñ kapitanı. Şimdi yüklülikniñ soñki aylarında buluna», – dep bildirdi müessise.
Berilgen malümatqa köre, azat etilgen 124 imayeci zabit ola, 89-ı – adiy asker ve çavuş.
Fevralniñ 24-nden berli eñ büyük deñişim oldı, dep bildirdi Ukrayına ştabı. Azat etilgen imayecilerni reabilitatsiya, uyğunlaştıruv ve tedaviylev bekley.
Ukrayına prezidentiniñ ofis yolbaşçısı Andriy Yermak sentâbrniñ 22-ne keçer gecesi Ukrayına 215 arbiyini Rusiye esirliginden qaytardı, dep bildirdi. Onıñ aytqanına köre, 108-i – «Azov» askerleri.
Kyiv Moskvağa Rusiye prezidenti Vladimir Putinniñ kumı Viktor Medvedçuknı, umumen 55 rusiyeli esirni berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
