Ukraina-Rusiye almaşuvında azat etilgen 35 adamnıñ episi 100-er biñ ğrıvnâ qadar bir kerelik maddiy yardım alacaq, haber etti Ukraina ombudsmeni Lüdmila Denisova.
"Yañıçıq Ukraina Nazirler Kabinetiniñ ekinci oturışında iştirak ettim. Müim bir qarar alındı - sentâbr 7-sinde azat etilgen 35 adamnıñ episi 100-er biñ ğrıvnâ qadar bir kerelik maddiy yardım alacaq. Bu ükümet qararınıñ yerine ketirilmesi içün Ukrainanıñ vaqtınca işğal etilgen topraqlar meseleleri nazirligi mesüliyetli", – yazdı Denisova öz Telegram kanalında.
Daa evel Denisova, Rusiye esirligenden Ukrainağa qaytqan qırımlılarğa Kyivde mesken mesken berilecek, dep haber etti.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
