Ukrayina Yuqarı Radasınıñ insan aqları vekâletlisi Dmıtro Lubinets 1978 adiy vatandaşnıñ Rusiye esirliginde bulunğanı tasdıqlandı, amma kerçek sayısı daa ziyade ola bile, dep bildirdi.
Onıñ qayd etkenine köre, ğayıp olğanlar cedvelinde 16000-den ziyade vatandaş ola bile, Rusiyede bulunğan esir vatandaş, yani şahsiyeti qayd etilmegenlerniñ sayısını "tek tahmin etmek mümkün", amma bu raqam "daa büyük ola bile".
"Bizim malümatımızğa köre, tasdıqlanğan 1978 vatandaş Rusiye esirliginde buluna. Ne içün tasdıqlanğan dep aytam? Rusiyede şahsiyeti qayd etilmegen vatandaş esirlerniñ olması mümkün olğanını añlaymız. Sayısını tek tahmin ete bilemiz", – dedi o, matbuat konferentsiyasında.
İyünniñ 27-nde Ukrayinada daa yedi vatandaş Rusiye esirliginden qayttı – episini Rusiye quvetleri 2022 senesi tuttı.
Ukrayina Cenk esirlerine munasebet meseleleri Koordinatsion ştabınıñ soñki malümatına köre, dört yıl içinde 9609 Ukrayina vatandaşı evine qaytıp oldı – arbiy ve adiy vatandaşlar.