İşğal etilgen Qırımdan eñ az 220 Ukrayina vatandaşı Rusiye akimiyeti tarafından qanunsız bir şekilde azatlıqtan marum etile. Olarnı esasen Aqmescitteki SİZOlarda ve Rusiye Federatsiyasında koloniyalarda tutalar. Mabüsler işkence ve tibbiy yardımnıñ yetişmegeninden zarar köre, dep bildirdi Jurnalist tedqiqatları merkezine bergen intervyüsında Qırım insan aqları gruppasınıñ koordinatorı Olga Skripnik.
Qayd etilgenine köre, Qırım insan aqları gruppası cenübiy Ukrayinanıñ işğal etilgen topraqlarında hırsızlanğan 86 sakinniñ kimligini belgiledi, olar Aqmescit SİZOsından keçtiler. Birinciden, bu Herson vilâyetiniñ sakinleri.
«Şimdi çoq sayıda insanğa acele tibbiy yardım kerek, onsız olar yaqın vaqıtta vefat ete bileler. Rusiye Federatsiyası tarafından buña doğru areket körmeymiz. Onıñ iç bir organı bu adamlarnı qaytarmağa yardım etmek içün bir adım atmadı», – dedi Skripnik.
Onıñ fikirince, Ukrayinada büyük cenk insan aqları saasında açıq bir inqiraz yaptı. Birinciden halqara teşkilâtlarnıñ – Qızıl Haç komiteti, BM ve OSCEniñ faaliyetinen bağlıdır.
Aq qorçalayıcı Rusiyeniñ büyük ücümi neticesinde yaratılğan Ukrayinadaki cinayetlerni tedqiq etüv halqara mustaqil komissiyasınıñ müsbet işini qayd etti. Bu sene komissiya bir esabat derc etti, anda Rusiye Federatsiyasınıñ maqsatlı cenk cinayeti olğan barışıqsever sakinlerge qarşı işkencelerniñ sistemalı ve keñ ölçüli ameliyatını tasdıqladı.
«Aq qorçalayıcılar 2014 senesinden berli işkenceler tesaduf degil, dep isbatlamağa tırıştı, Rusiye Federatsiyasınıñ siyaseti bu, hususan yañı işğal etilgen topraqlarda, em daa evel işğal etilgen topraqlarda vatandaşlarğa qarşı işkenceler. İftiralarnı talap etüv, yerli ealini qorquzuv, er angi tirenüvni bastıruv aqqında laf kete», – dep bildirdi QİAG koordinatorı.
Oktâbrniñ 1-nde derc etilgen BM İnsan aqları Yuqarı komissarınıñ esabatında Rusiye akimiyeti Ukrayina cenk esirlerini esirlikniñ er bir basamağında keniş ve sistemalı işkencelerge ve yaramay munasebetke oğratqanı qayd etildi.
Teşkilâtnıñ malümatına köre, Ukrayina cenk esirleri sert köteklengeni, elektrik aqımınen urulğanı, cinsiy zorbalıq, boğulğanları, uzun vaqıt devamında zor vaziyette bulunğanları, zornen ziyade fizik ağırlıqqa oğratılğanları, yuqusızlıq, idam taqlidi, zorbalıq ve horluqnen qorquzğanları aqqında haber eteler.
Ukrayina Mudafaa nazirliginiñ malümatına köre, Rusiyeniñ büyük ücüminden soñ eñ az 177 ukrayinli esirlikte elâk oldı, dep haber etti Mudafaa nazirligindeki cenk esirlerine munasebet koordinatsiya ştabınıñ vekili Viktoriya Tsımbalük Politiko neşirine.
Avropa Şurası Parlament Assambleyasınıñ qararında 2024 senesi sentâbrniñ 18-ne qadar 65 956 ukrayin arbiy ve sakin ğayıp olğan ya da esir sayılğanı qayd etile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
