Eñ az 15 qırımlı jurnalist Rusiye tarafından mahküm etildi, dep bildirdi Qırım aq qorçalayıcı gruppasınıñ yolbaşçısı Olga Skripnik «Rusiye mahküm etken Vladislav Yesipenko ve diger qırımlı jurnalistler nasıl qurtarılacaq» matbuat konferentsiyasında.
«Bugün eñ az 15 qırımlı jurnalist Rusiye uydurğan davalar sebebinden apiste yata. Bu raqam artında qoranta, ömür arqadaşları, balalar bar. Bu aileler toqtamayıp çekişe», – dep qayd etti o.
Aleksey Bessarabov, Vladislav Yesipenko, Seyran Saliyev, Marlen (Suleyman) Asanov, Timur İbragimov, Server Mustafayev, Osman Arifmemetov, Remzi Bekirov, Ruslan Suleymanov, Rustem Şeyhaliyev, Amet Suleymanov, Asan Ahtemov, İrina Daniloviç, Vilen Temeryanov, Ernes Ametov aqqında aytıla.
«2014 senesi Qırım işğalinden berli Rusiyeniñ bir maqsadı bar edi – söz serbestligini yoq etmek ve yarımada sakinleri aqiqatnı bilmeyip, tek Rusiye propagandasınıñ aytqanlarını eşitmesini temin etmek edi», – dep qayd etti Skripnik.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
