Dniproda Rusiye uçucısızlarınıñ gece ücümi neticesinde 15 kişi yaralandı. 8-i hastahanede yata, dep bildirdi Dnipropetrovsk vilâyetiniñ yolbaşçısı Dmıtro Lısak. Şeerde çoq qatlı ve mustaqil evler zarar kördi. Harkiv ve Kramatorsk şeerleri de ücümge oğradı.
Harkivde eki insan yaralandı. Esas darbe şeerniñ Osnovânskiy rayonına keldi, bir qaç vatandaş müessisesinde yanğın çıqtı. İndustrialnıy rayonında anbar yandı, Kyiv rayonında mesken evler zarar kördi. Kramatorskta 11 yaşında qızçıq, anası ve qartanası yaralanğanlar.
Rusiyede aprelniñ 9-na keçer gecesi uçucısızlar 11 regionğa ücüm etti. Rusiye Mudafaa nazirligi tüşürilgen 158 dron aqqında bildirdi. 67-si Krasnodar ülkesinde urıp tüşürildi, 29-ı Rostov vilâyetinde, 15-i Şimaliy Ösetiyada. Voronej, Kursk ve diger vilâyetler de ücümge oğradı. Yaralanğanlar aqqında haber etilmey.
Vladikavkaz, Volgograd ve Groznıy ava limanlarında uçuş sıñırlavları kirsetildi.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
