Kıyiv şeeriniñ arbiy memuriyetiniñ bildirgenine köre, Rusiye dronları Rusiyeniñ Kursk vilâyetinden uçtı, olar Sumı ve Çerkası vilâyetinden keçip, cenübiy-ğarbiy yöñelişten Kıyivge kirdi.
"Ava mudafaası quvetleri ve vastaları ile bütün duşman nişanları yoq etildi. Şimdilik paytahtta ne zarar körgenler, ne de viraneler qayd etilmedi (malümat alına)", – dep haber etile.
Odesa vilâyetiniñ arbiy memuriyetiniñ reisi Oleğ Kiper içtimaiy ağlarda yazğanına köre, rusiye uçucısız uçaqları mesken evlerge zarar ketirdi ve vilâyet merkezinde yanğın çıqardı. Qurtarıcılar 34 insannı, şu cümleden üç balanı qurtardılar.
"Yedi insan yaralandı, olardan ekisi bala. Olarğa kerekli tibbiy yardım kösterile. Bütün mütenasip hızmetler, aqibetlerni yoq etmek içün çalışmağa devam eteler", - dep qoştı o.
Ukrayina ava quvetleri aprelniñ 23-nde Rusiyeniñ kamikadze-dronlarınıñ Çerkası vilâyetinden Kıyivge, em de Herson vilâyetiniñ işğal etilgen qısmından Odesa vilâyetine areket etkenini haber etken edi. Ücüm telükesi saba saat 4-ke qadar devam etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
