Ukrayinanıñ Ternopil şeerinde dekabrniñ 2-nde gece Rusiye uçucısızı beş qatlı evge ücüm etti. Elâk olğan ve yaralanğanlar bar, dep haber ete yerli akimiyet.
Vilâyetniñ memuriyetiniñ yolbaşçısı Vâçeslav Negoda içtimaiy ağlarda yazğanına köre, darbe neticesinde evniñ yuqarı qatlarında yanğın çıqtı. Bir kişi can berdi.
Ternopil şeer yolbaşçısı Serğiy Nadal bildirgenine köre, ücüm neticesinde elâk olğanlar bar, lâkin qurbalarnıñ sayısı tam belli degil. Adise yerinde qurtaruv hızmetleri çalışa, yanğınnı söndüreler. Yaralanğanlar arasında ağır alda olğanlar bar, dep qoştı o.
Kyiv ve civarlarında bir gecede tahminen 20 Rusiye uçucısızı tüşürildi ya da tutuldı.
Yıqılğan binalar ve yaralanğanlar yoq, dep haber ete Kyiv şeeriniñ arbiy memuriyeti.
Hersonda tünevin Rusiye dronınıñ ücümi neticesinde üç barışıqsever sakin elâk oldı ve sekiz kişi yaralandı. Uçucısız şeerniñ Dniprovskıy rayonında taksige patlayıcı cihaz attı.
Bundan evel Ukrayina prezidenti Volodımır Zelenskıy keçken afta içinde Rusiye arbiyleri 500-den ziyade idare etilgen bomba, aman-aman 660 dron ve çeşit türlü 120-ge yaqın raketa qullanıp Ukrayinağa ücüm etti, dep bildirdi. «Dünyada iç bir memleket böyle uzun vaqıt devamında er kün böyle ücümlerge rastkelmegen edi», – dep yazdı o Telegram kanalında.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
