Rusiye ordusı bir künde Donetsk vilâyetiniñ 10 meskün yerine ateş açtı, dep haber ete Ukraina Milliy polisi mayısnıñ 3-nde saba.
«İşğalciler barışıqsever sakinlerni öldürdi, yaralanğanlar bar», – dep aytıla haberde.
Qayd etilgenine köre, 33 vatandaş obyekti zarar kördi – mesken evler, bala şifahaneleri, mektep, yaşayış obyektleri.
«Keçken künü Rusiye ordusı meskün yerlerge ateş açtı – Mariupol, Liman, Avdiyıvka, Pokrovsk, Seversk, Svâtogorsk, Yarova, Novomıkolayıvka, Oçeretino, Şevçenko», – dep bildirdi polis.
Uquq qoruyıcılarnıñ malümatına köre, Rusiye Federatsiyasınıñ ordusı vatandaş obyektlerine ava, «Grad» reaktiv topçu ateş sistemaları, tank, ağır toplardan ateş açtı, qanatlı raketalarnı qullandı.
Polis cenk qanunları ve adetlerini bozuv maddesine istinaden tahqiqat başlattı.
Müessise, vatandaşlarnı teşkerilmegen yolnen ketmemege ve belli olmağan şeylerni kötermemege çağırıp, Rusiye ordusı vatandaş maşinalarına ateş aça.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
