Rusiye arbiy memuriyeti Donetsk vilâyetiniñ «tolu işğal» kününi belgiledi, dep bildirdi Avditsıvka şeeriniñ arbiy memuriyet yolbaşçısı Vitaliy Barabaş «Ukrayınske radio» yayınında.
«Olar (arbiy memuriyet – QA) Donetsk vilâyetiniñ memuriy sıñırlarına çıquv kününi belgiledi. Şimdi dekabrniñ 31-i. Yani yılnıñ soñuna qadar Donetsk vilâyetiniñ memuriy sıñırlarına çıqmaq vazifesi berildi», – dep bildirdi Barabaş.
Memurnıñ aytqanına köre, «Rusiye arbiyleri Avdiyıvka işğal etilse, olarğa Pokrovsk ve diger mesken yerlerge yetmege qolay olacağını añlay». Olar içün «şeerniñ tepelerine çıqmaq» müim ola.
Aynı vaqıtta, Barabaş qayd etkenine köre, Avdiyıvkanı Rusiye ordusı «yoq ete».
Oktâbrniñ 10-nda Rusiye ordusı Avdiyıvka civarında faalleşti. Şeerge aviatsiya ve toplar yardımınen tanklar ve diger zırhlı tehnika ücüm etti. Ukrayına Silâlı quvetleriniñ Baş ştabı bildirgenine köre, bütün ücümler bu yönelişte keri qaytarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
