Rusiye ordusı mayısnıñ 22-nde saba Ukrayınanıñ Dnipropetrovsk vilâyetine avadan ücüm etti, dep bildirdi vilâyetniñ arbiy memuriyet yolbaşçısı Serğiy Lısak.
Vilâyette 15 uçucısız ve dört qanatlı raketa tüşürildi. Bir qaç darbe endirildi. Dniprovskıy rayonında 27 yaşında er adamı yaralandı, ağır alda hastahanege alındı. Qurtaruv bölükleriniñ bir qaç inşaatı ve bir qaç maşina, şu cümleden tehnika zarar kördi. Eki yanğın çıqtı, söndürildi.
Bundan ğayrı, uçucısız İllarionovskada tüşti, raketa parçaları da anda tapıldı. Yedi kişi yaralandı, 52 ve 70 yaşlarında qadınlar hastahanege alındı. Ücüm bir qaç mustaqil ve çoq qatlı evge zarar ketirdi, bala bağçası, tükânlar, memuriy bina ve maşinalar da zarar kördi.
Mayısnıñ 21-nde Ukrayına cenübiniñ Mudafaa quvetleriniñ matbuat hızmeti yolbaşçısı Natalâ Ğumenük Rusiye «Kalibr» taşıyıcılarını Qara deñizge çıqardı, uçucısızlarnen istihbarat quvetleştirdi, dep bildirdi.
Ukrayına Silâlı quvetleriniñ Ava quvetleri mayısnıñ 19-nda gece Rusiye arbiyleriniñ 22 Shahed İran uçucısızından 16-sını ve altı «Kalibr» qanatlı raketasından üçüni yoq etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
