Eki Rusiye konsullığınıñ diplomatlarına Ukrainadan çıqmaq içün azır olmağa emir etildi. Bu aqta The New York Times gazetası Ukraina telükesizlik hızmetiniñ yüksek rutbeli hadiminiñ malümatına esaslanıp yaza.
Neşirniñ subetdeşi esasen Rusiye diplomatlarınıñ bala ve ömür arqadaşları olğan 18 kişi Ukrainanı yanvarniñ 5-nde terk etti, dep bildirdi. Daa tahminen 30 insan Kyivdeki Rusiye elçihanesinden ve Lvivdeki konsullıqtan ketti.
ABD resmiy vekili bildirgenine köre, Washingtonnıñ olacaq tahliyeden haberi bar edi. «Rusiye ükümetiniñ qoranta azalarını Ukrainadaki elçihanesinden dekabrniñ soñunda ve yanvarniñ başında tahliye etmege azırlanğanına dair malümatımız bar».
Rusiye elçihanesi sayısınıñ eksiltilüvi «qısmen propaganda, qısmen yaqınlaşqan zıddiyetke azırlıq ya da qısmen ayneci usul, ya da birden üç stsenariy ola bile», dep yaza gazeta Ukraina ve Amerika memurlarınıñ malümatına esaslanıp.
Washington, Rusiye prezidenti Vladimir Putin istilâ etüv qararını daa almadı, dep tüşüne, dep aytıla maqalede.
Rusiye Tış işler nazirligi maqaleni tefsir etmek ricasına Kyivdeki Rusiye elçihanesi eskisi kibi çalışa, dep cevap berdi, dep haber ete «İnterfaks».
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr etip, ABD ve NATOdan telükesizlik kefaletlerini talap etti – hususan NATOnı şarqqa kenişletmemek.
Rusiyeniñ talaplarınen bağlı halqara muzakerelerniñ ilk basamağı keçken afta Jeneva ve Brüsselde olıp keçti. Taraflar mesleatlarnı ciddiy ve açıq dep adlandırdı, amma büyük fikir zıddiyetleri bar, dep qayd etti. Rusiye prezidentiniñ matbuat kâtibi Dmitriy Peskov muzakere neticesinde muvafaqiyetsiz keçti, dep ayttı.
