"Pervıy otdel" aq qorçalayıcı leyhası ve Parubets Analytics Rusiyede devlet telükesizligine qarşı cinayetlerde qabaatlanğan 555 Ukrayina vatandaşınıñ kimligini belgiledi. Ukrayinalılarğa qarşı cinaiy davalarnıñ sayısı daa çoq, çünki bir çoq dava gizli ola, mahkeme kartları ise şahsiy malümatsız derc etile, dep aytıla tedqiqatta.
Devlet hainligi maddesine istinaden Rusiye vatandaşlığını alğan 325 ukrayinalı qabaatlandı. 199 insan casuslıqta, 18 kişi çetel devletnen gizli işbirliginde ve sekiz insan duşmanğa yardım etkeninde qabaatlandı.
323 insanğa qarşı qabaat belli oldı. Yarısından ziyadesi (176 kişi ya da 54,5%) Ukrayina tarafına malümat toplap bergeninde qabaatlana, dep qayd etile.
402 insan ya da 72,4% Rusiye mahkemeleri tarafından mahküm etildi. Yedi kişi ömür boyu apis cezasını aldı, qaldı 375 – 5 yıldan 27 yıl ve 9 ayğa qadar azatlıqtan marum etildi. Ükümlerniñ ekseriyeti (241 ya da 60,1%) "DNR" ve "LNR", işğal etilgen Herson ve Zaporijjâ vilâyetleri ve ilhaq altındaki Qırımnıñ işğalci mahkemeleri tarafından çıqarıldı.
Böyle davalarnıñ eñ az beş mabüsi cinaiy taqip ya da üküm çıqarılğan soñ elâk oldı, 249 ukrayinalı ğayıp olğan dep sayıla, dep aytıla tedqiqatta. Ğayıplarnıñ çoqusı Rusiyeniñ Ukrayinağa qarşı büyük istilâsı başlağan soñ oldı, eñ çoq ğayıp ise 2023 senesi qayd etile.
2026 senesi avgustnıñ 8-ne qadar tedqiqatta qayd etilgen 555 insandan 534-ü apiste qalğan edi. Tedqiqatçılar 360 insannıñ bulunğan yerini bilip oldı. 236 kişi, olarnıñ malümatına köre, Rusiyede, 124 insan işğal etilgen Ukrayina topraqlarında SİZO ve koloniyalarda tutula.