Rusiye Devlet dumasınıñ işğal etilgen Qırım deputatı Ruslan Balbek, Jenevada keçirilgen İnsan aqları, demokratiya ve uquq üstünligi meseleleri Forumında çıqışta bulunğanını iddia ete. Balbek noyabrniñ 23-nde forum munaqaşasında iştirak etkenini aydınlatqan foto ve video parçasını derc etti.
O, Qırım.Aqiqat muarririyetini Ruslan Balbekniñ Jenevadaki forumda iştirak etmegenine dair malümatnı derc etkeninde qabaatladı.
«Men ne İsviçre, ne çıqışlarda yoq edim, deyler ve, olarğa köre, Devlet dumasınıñ deputatı Ruslan Balbek, belki de, iç yoq. Közleriñizni açtırayım, cemaat, – men barım! Ve Jenevada – BM insan aqları meseleleri forumında Qırımda insan aqları ve milletlernen bağlı fikirlerimni resmiy şekilde ve açıqça bildirmege imkânım oldı», – dep yazdı Ruslan Balbek Facebookta.
Qırım.Aqiqat, Ukraina haber siyaseti naziriniñ birinci muavini Emine Cepparnıñ sözlerini derc etti. Onıñ bildirgenine köre, Ruslan Balbek Rusiye eyyetiniñ erkânında bar edi, amma forumda çıqışta bulunmadı ve forumda söz alğan Rusiye vekili Qırımdan temsilci olğanını aytmadı.
Forum vesiqalarında Ruslan Balbekniñ adı yoq.
Qırım.Aqiqat, Ruslan Balbekniñ Ukraina haber siyaseti naziriniñ birinci muavininiñ malümatınen bağlı izaatlarını almağa tırışa. Matbuat kâtibi vaziyetni izaatlamay, Balbekniñ özü ise telefonda cevap bermey.
Rusiye Devlet dumasınıñ işğal etilgen Qırım deputatı Ruslan Balbek, insan aqları, demokratiya ve uquq üstünligi meselelerine bağışlanğan BM tedbirlerinden birinde iştirak etkenini bildirdi.
Sentâbrniñ 11-nde Varşavada keçirilgen OSCE konferentsiyasında Ukraina eyyeti Qırımnıñ eki Rusiye «vekiline» çıqışta bulunmağa imkân bermedi. Rusiye kütleviy haber vastalarınıñ malümatına köre, daa soñra konferentsiyada Rusiye kontrolindeki Qırımnıñ bulğar milliy-medeniy muhtariyetiniñ vekili İvan Abajer çıqışta bulundı.
Emine Ceppar, Ukraina akimiyeti Qırım «vekilleriniñ» Varşavadaki OSCE konferentsiyasında iştirak etmek içün Şengen alanınıñ sıñırlarından angi vesiqalar esasında keçkenini teşkere.
Ceppar, Varşavadaki OSCE toplaşuvında iştirak etken işğal altındaki Qırımnıñ Rusiye kütleviy haber vastaları «gibrid cenki çerçivesinde areket etti», dep tüşüngenini bildirdi.
