Rusiye Devlet duması Rusiye Federatsiyasınıñ Dünya sağlıq teşkilâtından çıqmaq niyeti aqqında bildirdi. Spiker muavini Petr Tolstoynıñ aytqanına köre, bu qarar Avropa Şurası ile munasebetlerni bozuvdan soñ «nevbette» buluna, dep haber ete «Vedomosti».
«Dünya sağlıq teşkilâtı memleketimizge qarşı sanktsiyalarğa qoşuldı, çalışqan ofisni [Moskvada infektsiya olmağan hastalıqlarnıñ profilaktikası] qapattı. Rusiyeni qıymetlerimizge zıt kelgen fikir ve qaidelerge mecbur etecek olalar. Bu faktorlar bu teşkilâtta işimiz olmağanını köstere», – dep qayd etti o.
Devlet dumasındaki reberlikte olğan «Vedomosti» menbası bildirgenine köre, Dünya sağlıq teşkilâtından çıqmaq Tolstoynıñ şahsiy teşebbüsi ola. Deputat bu ğayeni çoqtan seslendire, amma parlamentte bu mesele muzakere etilmedi. Gazetanıñ diger subetdeşi icra akimiyet Tolstoynıñ teşebbüsine qarşı çıqa, şunıñ içün «munaqaşa devam etecek», dep ayttı.
Mayısta teşkilât Moskvada infektsion olmağan hastalıqlarnıñ profilaktikası ofisini qapata, dep ilân etti. O, sağlıq, epidemiologik nezaret, profilaktika meselelerinde siyasetnen oğraşqan edi.
Bundan soñ Dünya sağlıq teşkilâtı Rusiyeniñ Ukrayınağa qarşı istilâsını, hususan tibbiy müessiselerge qarşı ücümlerni takbih etken qararnı qabul etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
