Rusiye Devlet duması baş nazir vazifesine Mihail Mişustinniñ namzetini tasdıqladı.
Bundan evel Rusiye prezidenti Vladimir Putin onıñ namzetini Rusiye parlamentiniñ alt palatasınıñ baqmasına kirsetti, dep haber ete «Nastoyaşçeye vremâ».
«O, problemalarğa sistematik baqa. O, tsifrovizatsiya degen şeynen de oğraşa. İşdeşlerim, sizden Rusiye Federatsiyasınıñ prezidentine qoltutıp, Devlet Dumasına Mişustin Mihail Vladimiroviçniñ Rusiye Federatsiyasınıñ baş naziri olaraq tayinlemesine izin bermeñizni rica etem», – dep ayttı Garri Minh Mişustinni taqdim etip.
Rey berüv başlamazdan evel Mişustin çıqışta bulunıp, Putinniñ Federatsiya Şurasına yapqan muracaatınıñ tezislerini tekrarladı. Qorantalarğa vaqtında tölev yapılmasınıñ zaruriyeti, mekteplerde balalarğa sıcaq aş berilüvi, yañı iş yerleriniñ qurulması ve ükümet islâatlarınıñ kerekligi aqqında aytıldı.
O, iqtisadiy sektornıñ islâatı, küçük biznes içün şaraitler, mudafaa-sanayı kompleksiniñ pekitilmesi ve regionlarnen işbirliginiñ ilerilemesi aqqında da ayttı.
Dmitriy Medvedev yolbaşçılığında ükümet istifağa çıqqan soñ yañı baş nazir tayinlendi. Bundan bir qaç saat ögüne Putin anayasa islâatlarını ilân etti.
Yanvarniñ 16-nda saba Devlet dumasınınıñ ekseriyeti olğan «Yedinaya Rossiya» fraktsiyasınıñ azaları memleketniñ baş naziri vazifesine Mişustinniñ namzetine bir ağızdan qoltuttı.
Mişustin, Nazirler şurasınıñ erkânını deñiştirecek, dep bildirdi, amma angi deñişmeler aqqında laf ketkenini aytmadı. Esas meseleler arasında raqamlı iqtisadiyat ve milliy leyhalar bar olğanını ayttı.
Şimdilik Mişustin yañı şuranı şekillendirmedi, nazirlerniñ vazifelerini vaqtınca Medvedev ükümetiniñ sabıq azaları eda etecek.
