Rusiye Devlet Duması Federal telükesizlik hıhmetiniñ sabıq hadimlerine hızmetlerini bitirgen soñ çetelge çıqmağa yasaqlaycaq qanun leyhasını baqacaq.
Azatlıq Radiosınıñ bildirgenine köre, vesiqa «Yedinaya Rossiyanıñ» dört deputatı, şu cümleden firqanıñ yuqarı şura azası Vasiliy Piskarev ve Aleksandr Hinşteyn tarafından kirsetildi.
Tefsirde yasaq, qanun leyhasınıñ müelliflerinde olğan malümatqa köre, diger memleketlerde Rusiye devlet telükesizligi organlarınıñ sabıq hadimleriniñ sıqlaşqan yaqalanması ve apiske alınmasınen bağlı. Örnekler yoq.
«Qanun leyhası Federal telükesizlik hızmeti organları sabıq hadimleriniñ telükesizligini quvetleştirmege imkân berecek», – dep ayttı Aleksandr Hinşteyn RBK neşirine. Onıñ qayd etkenine köre, qanun leyhası qabul etilse, telükesizlik organlarınıñ sabıq hadimleriniñ çıquv sıñırlarına dair qararnı FSB özü alacaq.
Al-azırda yüksek seviyeli gizlilik malümatını bilgen sabıq FSB hadimleriniñ Rusiyeden çıqması yasaqlana. 2013 senesi Rusiye İç işler nazirligi çalışqan hadimlerge reberlikten izin almayıp çetelge çıqmağa yasaq etken edi. Bunıñ sebebi çetel mahsus hızmetleri tarafından politsiya hadimlerine sıqlaşqan işbirligi teklifleri olğan eken.
