Rusiye Devlet Dumasınıñ Aqyar deputatı Dmitriy Belikniñ bildirgenine köre, aq qorçalayıcı teşkilâtlarınıñ vekilleri Qırımnı maniasız ziyaret ete bile. Bu şekilde o, Avropa Şurası nazirleriniñ yarımadağa aq qorçalayıcılarnı kirsetmek talabını izaatladı.
Rusiye deputatı «Qırımda kösterilecek şeyler bar», dep ayttı.
«Cesür avropalı aq qorçalayıcılarnıñ sıñırdan keçmege tırışqanda olarnı kirsetmegenimizni köstergen yüzlernen megabayt video qayda? Olar yoq. Amma onlarnen, yüzlernen diger levha bar. Misal olaraq – Tyerri Marianiniñ ziyareti – Frenkistan ükümetiniñ sabıq naziri», – dep yazı Devlet Dumasınıñ aytqanlarını «RİA Krım» rus neşiri.
Frenkistan parlamentiniñ sabıq deputatı Tyerri Mariani işğal etilgen yarımadağa ilk sefer kelmey.
Ukrainada Qırım Muhtar Cumhuriyetiniñ prokuraturası 332-1 maddesine istinaden Mariani ve diger frenk deputatlarınıñ 2016 senesi vaqtınca işğal etilgen Qırımğa kiriş nizamını bozğanı içün cinaiy tahqiqat başlattı.
Ukraina Tış işler nazirliginiñ qayd etkenine köre, çetel siyasetçileriniñ Qırım ziyaretleri resmiy degil.
Ukraina nazirligi 2016 senesi iyül ayında muracaat derc etip, çetel vatandaşlarını ve vatandaşlıqsız şahıslarnı Qırımğa qanunsız ziyaretlerden vazgeçmege çağırdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
