Rusiye Devlet duması akimiyet organları, devlet timsalleri ve cemiyetke nisbeten ürmetsiz ifadeler içün mesüliyet qanun leyhasını ekinci oquvda tasdıqladı. Bunıñnen beraber, «yañlış» haber paylaşqanından sebep para cezalarına dair da qanun leyhası ekinci oquvda tasdıqlandı. 327 deputat qoltuttı, 42 – qarşı çıqtı. Bu aqta Azatlıq Radiosınıñ rus bürosı haber ete.
İşbu qanun leyhalarını Devlet dumasına Rusiye Federatsiya Şurasınıñ qanunlar komitetiniñ reisi Andrey Klişas, deputatlar Lüdmila Bokova ve Dmitriy Vâtkin tarafından kirsetilgen edi. Olar akimiyetni ve devlet timsallerini aqaretlegen vatandaşlarnı 5 biñ ruble para cezasına ve 15 kün memuriy apis cezasına üküm etmege teklif etken ediler. Qanun metnine köre, ceza berilecek malümat sayğısızlıq ifadelemeknen beraber «insan itibarını ve cemaat ahlâqını aqaretlemeli».
«Yañlış» malümat paylaşqan vatandaşlarnı 100 biñ ruble, memurlarnı 200 biñ rublege qadar, şirketlerni ise yarım million rublege qadar para cezalarına üküm etmege teklif etile. Tekrar bozuv ya da yaşav destegi, sanayı ya da banklarnıñ işine keder etken «yañlış» malümat paylaşuvı içün şirketlerge berilecek para cezası bir buçuq million rublege qadar yete bile.
Ekinci oquvda yımşatqan tüzetüvler qabul etildi. Olar resmiy şekilde qayd olğan kütleviy haber vastalarına yañlış malümatnı tez silip, para cezasını almamağa imkâye bere.
