Rusiye Devlet duması ükümetke Rusiyede ya da onıñ belli bir qısmında yüksek seviyeli azırlıq ya da fevqulâde vaziyetni ilân etmesine izin bergen qanun leyhasına qoltuttı. Fevqulâde vaziyet içün sebepler cedveline daa bir madde qoşuldı – insanlar içün telükeli olğan hastalıqnıñ tarqaluvı. Bu aqta Devlet dumasınıñ saytında haber etile, dep bildire Azatlıq Radiosı.
Martnıñ 26-nda ükümet tarafından parlamentke kirsetilgen qanun leyhası icra akimiyetke yüksek seviyeli azırlıq ve fevqulâde vaziyet ilân etilgende mecburiy qaidelerni belgilev aqqını bere.
Vesiqa ükümetke tizilgen cedvelge köre ilâclarnıñ kötere ve dane-dane satışını eñ çoq 90 kün devamında sıñırlamaq aqqını bere. Bundan ğayrı, fevqulâde vaziyet şaraitlerinde ükümetniñ ayrı allarda iflâs davalarınıñ açılmasına moratoriy qoymaq aqqı bar.
Devlet dumasınıñ uquq idaresi, vesiqa koronavirusnen küreş ihtiyacı sebebinden salâhiyetniñ kenişletilüvi nazirler şurasına sebepsiz vekâlet bere bile dep, onı tenqit etti. Lâkin tezden fikir derc etilgen soñ onı Devlet dumasınıñ saytından silgenler, yerine ise müsbet bir tefsir qoyğanlar, dep yazdı «Otkrıtıye media».
