Rusiyede ordunıñ «itibardan tüşürilüvi» ve «sahte malümat» maddelerine istinaden 615 cinaiy dava açıldı. Bu aqta Rusiye Tahqiqat komitetiniñ yolbaşçısı Aleksandr Bastrıkin bildirdi.
Mezkür maddeler Rusiye Cinaiy kodeksinde Ukrayinağa qarşı büyük istilâ başlağan soñ peyda oldı. O vaqıttan berli «sahte malümat» maddesine istinaden 444 dava açıldı, 141-i – 2024 senesi. Rusiye ordusını «itibardan tüşürüv» maddesine istinaden 171 dava açıldı, 2024 senesi – 72 danesi.
Rusiye mahkemesi Rusiye Mudafaa nazirliginiñ versiyasınen aynı olmağan Ukrayinadaki cenk haberlerini «sahte malümat» olaraq tanıy. Rusiyeniñ Ukrayina cenkine «mahsus arbiy operatsiya» ibaresi yerine «cenk» sözü qullanılğanda bunı «itibardan tüşürüv» olaraq tanıylar. «Sahte malümat» maddesine köre 15 yıl apis cezası, «itibardan tüşürüv» ise 7 yılğa qadar apis cezası berilmesini belgilemekte.
Bastrıkin aytqan raqamlar açıq menbalarda olğan raqamlardan bayağı çoq.
Tahqiqat komitetiniñ yolbaşçısı terror maddelerine istinaden açılğan davalar aqqında tarif etti. Olarnı naqliyat infrastrukturası ve diger obyektlerniñ zarar körmesi sebebinden açalar. Bastrıkinniñ malümatına köre, bir yılda 429 böyle dava tahqiq etildi. Böyle cinayetlerniñ büyük qısmı dolandırıcılarnıñ tesiri altında oldı, dep ayta jurnalistler.
Ukrayina prezidentiniñ Qırım Muhtar Cumhuriyetindeki temsilciligi bildirgenine köre, Rusiyeniñ Ukrayinağa büyük istilâsı başlağanından berli işğal etilgen Qırım sakinlerine qarşı Rusiye ordusını itibardan tüşürgenleri içün 1242 dava açıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
