Keñiş mıqyaslı cenk başlamazdan evel Ukrayina Ombudsmanınıñ ofisi, Rusiyede ukrayinler içün filtirleme lagerlerini yaratqanını, amma halqara toplulığı buña kerekli kibi diqqat etmegenini bildirdi. Bunı Ukrayina Yuqarı Radasınıñ insan aqları vekâletlisi Lüdmila Denisova "Levıy bereg" neşrine intervyü bergende ayttı.
"Fevralniñ 18-nde ORDLO-dan 90 biñ Ukrayina vatandaşı Rusiye topraqlarına alıp çıqarılğan edi. O zaman er keske, şu cümleden halqara aq qoruyıcı teşkilâtlarğa, BMT muracaat ettik, amma iç bir kimse buña diqqat etmedi", - dep qayd etti ombudsman.
Onıñ sözlerine köre, keñiş mıqyaslı cenk başlanğandan berli ukrayinlerniñ böyle lagerlerge mecburiy çıqarılması kütleviy olğan.
"Adamlardan, Rusiyege qoltutasız ya da yoq, soraylar. "Natsiklersiz" ya da yoq. Ukrayinda qalğan tuvğanlarıñız barmı... Adamlardan telefonlarnı, pasportlarnı tutıp alalar... Ombusman ofisinde çalışqan meslekdeşimniñ ikâyesi bar: Mariupolniñ sol sailinde yaşağan tuvğanlarını Vladimir vilâyetine Suzdalge çıqarğanlar. Martnıñ 20-nden başlap olarnen bağ yoq", - dedi Denisova.
Mecburen çıqarılğan ukrayinler aqqında malümat almaq içün, ombudsman Rusiye insan aqları vekâletlisi Tatyana Moskalkovağa resmiy muracaat etken. Cevap alâ daa yoq.
"Olarnıñ cevabı yoq, dep tüşünem. Çünki kim bu adamlar, adları ne kibi malümat olarğa kerek degil, amma olduqça çoq bizim vatandaşamıznı Rusiyege çıqarmağa isteyler", - dedi Denisova.
O, Ukrayina Ombudsmanı ofisiniñ malümatına köre, şimdi söz 600 biñden ziyade mecburen çıqarılğan ukrayinler aqqındadır, olarnıñ arasında 117 biñ baladır.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
