Rusiye Ukrainağa qarşı cenkni Qırım ilhaqından başlattı. Bu aqta Ukraina Yuqarı Radasınıñ spikeri Andriy Parubiy fevralniñ 19-nda Ukraina parlamentiniñ Rusiyeniñ Ukrainağa qarşı silâlı istilâsı başlağanınıñ beş yılına bağışlanğan toplaşuvında ayttı, dep bildire Qırım.Aqiqat mühbiri.
«Rusiye Mudafaa nazirliginiñ «Qırımnı qaytaruv içün» medalinde 2014 senesi fevralniñ 20-si künü qayd etile. Tam beş yıl evelsi… Rusiye mahsus bölükleri Ukrainanı zapt etmege başladı. Rusiye Maydanda insanlarnıñ atıp öldürilgenine şaşqan ve akimiyet tarafından qaldırılğan memleketniñ zayıflığını qullanıp, silâlı istilâsını başlattı. Soñra Putin Qırım ve Donbastaki adise-vaqialarda Rusiye askerleriniñ iştirakini daa çoq inkâr etken edi. Lâkin bir kün Gaaga mahkemesinde inkâr etilmeycek delillerden biri olacaq o medalde 2014 senesi fevralniñ 20-si dep yazıla. Cenk böyle başlağan edi», – dedi Parubiy.
Daa evel toplaşuvda Avropa şurasınıñ reisi Donald Tusk qayd etkenine köre, Avropa Birligi Rusiyeniñ Qırım ilhaqını iç bir vaqıt tanımaycaq ve Rusiyeniñ Azaq deñizindeki istilâsına razı olmaz.
Fevralniñ 19-nda Ukraina Yuqarı Radasında Rusiyeniñ Ukrainağa qarşı silâlı istilâsı başlağanınıñ beş yılı munasebetinen toplaşuv keçirile.
Ukraina prezidenti Petro Poroşenkonıñ çıqışı beklenile. Davet etilgenler arasında – Ukraina baş naziri Volodımır Groysman, ükümet azaları, cemaat teşkilâtları, ATO veteranları birligi, Qırımtatar Milliy Meclisiniñ vekilleri, meşur ukrain ve çetel siyaset erbapları, halqara parlament teşkilâtları ve diplomatik korpusnıñ temsilcileri.
Ukraina Yuqarı Radası 2014 senesi fevralniñ 20-ni Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti. 2015 senesi oktâbrniñ 7-nde Ukraina prezidenti Petro Poroşenko bunıñnen bağlı qanunnı imzaladı. Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey.
