Soñki eki ayda Rusiye Ukrayınağa qarşı cenkte yerustü quvetlerni küçlendirmek içün yañı büyük arbiy birleşmelerni şekillendirip başladı. Bu aqta Britaniya Mudafaa nazirligi yazıp, 25-inci umumarbiy ordunıñ quruluvını qayd ete.
«Rusiye Ukrayınağa istilâ etken soñ birleşmeler ve piyade territorial mudafaa polkları içün seferber etilgen yedekteki arbiylerni qullandı. Rusiye umumarbiy ordu kibi yañı umumarbiy teşkilâtlarnı pek az şekillendire. Tek özüni yaramay köstergen 2022 senesi yazda qurulğan 3-ünci ordu korpusı istisna oldı. Rusiye, büyük ihtimalnen, er angi yañı birleşmeni Ukrayınada yedek olaraq qullanır», – dep aytıla haberde.
Britaniya tarafı qayd etkenine köre, Rusiye NATOğa qarşı küçlerini quvetleştirmege tırışa.
«Mecburiy seferberlikniñ yañı dalğası olmasa, Rusiye bir yañı ordunı bile temin etip olamaz», – dep aytıla Britaniya Mudafaa nazirliginiñ istihbaratnıñ malümatına esaslanğan haberinde.
Rusiyede Ukrayınağa qarşı büyük istilâ başlağanından askerlik ve vatandaşlarnı orduğa celp etüv qanunları daima deñişe ve ilâve etile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
