Jenevadaki BM ve diger halqara teşkilâtlarnıñ Rusiye temsilciligi BMge muracaat etip, işğal etilgen Qırımnıñ suv temini vaziyetine «qıymet kesmege» çağıra.
«BM insan aqları şurası, BM insan aqları Yuqarı komissarınıñ idaresi ve BMİAŞ mahsus bölüklerini yarımada sakinleriniñ tatlı suv aqqını bozğan Kyivniñ Qırımnıñ suv qamaçavı areketlerine qıymet kesmege çağıramız», – dep aytıla haberde.
BM Ukraina Monitoring missiyası Qırım yarımadasınıñ işğaline esaslanıp, «Rusiye Qırımda qorçalanğan insanlarnıñ suvnen temin etilüvinden mesüliyetlidir», dep israr ete.
Sentâbr ayında Ukraina Tış işler naziriniñ birinci muavini Emine Ceppar BM insan aqları Yuqarı komissarı Michelle Bachelet ile online körüşip, yarımada sakinlerini suvnen temin etüv aqqında tafsilâtlıca tarif etti.
Ukrainanıñ BM Serğiy Kıslıtsânıñ Qırım.Aqiqatqa bildirgenine köre, Rusiye Ukraina akimiyetine resmiy şekilde muracaat etse ve özüni işğalci memleket dep qabul etse, Dnipro suvınıñ işğal etilgen Qırımğa berilmesi mümkün olacaq.
Gidromettsentr, sentâbr yağmurları yarımadanıñ suv anbarlarını toldurmadı, dep bildirdi. Rusiye kontrolindeki Aqmescit memuriyeti şeerlilerni suvnen teminlev vaziyetini «stabil» dep saya. Rosgidromet sentâbrniñ 30-nda yağanaqlarnı arttırmaq içün Aqmescitke uçaq keldi, dep bildirdi.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
