Rusiye saban ayınıñ 11-nden çeçek ayınıñ 11-ne qadar Ukrayina üzerinde 70 çeşit raketa, 2200-den ziyade "Şahed" pilotsız uçağı ve altı biñden ziyade idare etilgen aviatsiya bombasını uçurdı, dep bildirdi Ukrayina tış işler naziri Andriy Sıbiğa.
Onıñ aytqanına köre, bu Rusiye Federatsiyasınıñ Amerika Birleşken Devletleri tarafından teklif etilgen ateş toqtatılmasına cevabı edi.
"Bugün, tam bir ay evelsi, Rusiye ABD teklif etken ateş toqtatılmasını red etti. Tam bir ay evelsi, saban ayınıñ 11-nde, Ciddede, Ukrayina böyle bir teklifke razı oldı. Şartsız. Rusiye bunı red etti, onıñ yerine şart ve talaplar qoydı. Aynı zamanda Rusiye, tınç ealige qarşı terrornı quvetleştirmege devam ete edi", — dep yazdı Sıbiğa X içtimaiy ağında.
"Bu Rusiye içün tipik bir şey: yalan, manipulâtsiya, terrornıñ devam etmesidir. Bir ay devamında tınçlıq ola bile edi, ABD, Avropa ve diger ortaqlar ıntılağan adaletli barışıqnı ileriletmek içün işanç yaratmaq içün areketler yapıla bile edi", _ dep qoştı nazir.
O, Rusiye barışıq yolundaki yekâne mania ve cenkniñ yekâne menbası olğanını qayd etti.
"Bizge Moskvağa basqını arttırmaq içün daa bir ay beklemek kerekmey. Rusiye barışıqqa ciddiy yanaşmaq içün kerçek küçni is etmeli", — dep qayd etti nazir.
Soñki aftaları Ukrayina ve ABD arasında, em de Rusiye Federatsiyası ve ABD arasında ateş toqtatılması meselesinde bir qaç körüşüv ve telefon lafı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
