Rusiye Belgorod vilâyetiniñ Golovçino köyüne ateş açılğanını bildire, yaralanğanlar yoq. Bu aqta Belgorod vilâyetiniñ valisi Vâçeslav Gladkov bildirdi.
Onıñ aytqanına köre, ateş Ukraina tarafından açıldı.
Rusiyeniñ Belgorod vilâyetiniñ Ukrainanıñ Harkiv ve Sumı vilâyetinen bir sıñırı bar.
Ukrainağa yaqın Rusiye vilâyetlerinde aprelniñ 11-nde terror telükesiniñ «sarı» («yüksek») seviyesi ilân etildi. O, Kursk, Belgorod, Brânsk vilâyetlerinde, Voronej vilâyetiniñ eki rayonında, Ukrainanen deñiz üzerinde sıñırı olğan Krasnodar ülkesiniñ eki rayonında ve Rusiye işğal etken Qırımnıñ şimalinde çalışa.
Ukraina tarafı bu qabaatlavlarnı daa izaatlamadı, lâkin Rusiye öz toprağına özü ateş aça bile.
Ukraina sıñırına yaqın Rusiyeniñ Belgorod şeerindeki cermay bazasında aprelniñ 1-nde yanğın oldı. Rusiye valisi «Ukraina Silâlı quvetleriniñ eki vertolötından avadan darbe endirildi», dep bildirdi. Aprelniñ 2-nde Conflict Intelligence Team (CIT) gruppası Rusiyeniñ Belgorod şeeri yaqınlarında patlağan raketa Rusiyeden keldi, dep haber etti.
Ukraina Silâlı quvetleriniñ Baş ştabı Rusiye akimiyeti «devamlı, qıyın cenk» qararını aqlamaq içün provokatsiya yapa bile, dep tenbilegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
