İşğal etilgen Qırımda basqılar ve qanunsız apis cezaları neticesinde 252 bala babasız qaldı. 16 bala soy-soplarından biri tutulğan soñ doğdı, dep bildirdi Kreml mabüsi Seyran Saliyevniñ qadını Mümine Saliyeva.
"Olar Qırımnıñ er bir köşesinde yaşaylar: Bağçasaray rayonında — eñ çoq (100-den ziyade bala), Aqmescit, Canköy, Eski Qırım, Yalta, Aluşta, Qarasuvbazar, Kefe (Kirov) rayonlarında", — dep aytıla haberde.
Onıñ aytqanına köre, facia ve stresni başından keçirgen balalarnen çalışmaq qıyındır. Farqlı yaş kategoriyaları, şahsiy ağrı ve travma, diñlenmek kerek olğan şahsiy ikâyeler.
"Safiyem bir qaç kün evel flipkartta babamıznı qafeste ve qapalı közlü globusnıñ resimini yaptı. "Bu apiste yatqan babamoz. Ve bizim problemlerimizni körmegen dünya", dep añlattı o maña. "Dünyada yahşı insanlar da bar", dep ayta bildim oña men. "Ebet, amma qanunlar er yerde adaletsiz", devam etti aqıllı qızım. "Yalıñız olmağanımız yahşı, biz berabermiz, qayğırğan musulmanlar da bahşış ketirdi", öpip, quçaqlap, ruhumnı kötermege tırıştı", - dep yaza Mümine Saliyeva.
Daa evel "KrımSOS" aq qorçalayıcı teşkilâtı, 2024 senesi Qırımda eñ azından 56 qırımlı Rusiye akimiyeti tarafından taqip etilgenini bildirgen edi. Bundan ğayrı, Rusiye quvetçileri yarımadada 45 qanunsız tintüv keçirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
