Rusiye akimiyeti Ukrayina ve ABD muzakereleri neticesinde azırlanğan 20 maddelik barışıq planına "esas deñişmelerniñ" kirsetilüvini talap etecek, dep haber ete Bloomberg Kremlge yaqın menbağa esaslanıp.
Agentlikniñ subetdeşi aytqanına köre, Rusiye bu 20 maddeni kelecek muzakerelerniñ başlanğıçı olaraq köre, çünki planda Moskva içün müim maddeler yoq. Rusiye vesiqanı "salqın aqılnen" baqacaq, dep qoştı menba.
Moskva planda Ukrayina Silâlı quvetleri içün qoşma sıñırlavlar olmasını talap etecek, dep aytıla maqalede. Rusiye NATOnıñ şarqqa kenişlemesinden vazgeçüv kefaletleri ve Ukrayinanıñ Avropa Birligine qoşulması vaziyetinde neytarl statusınıñ olmamasına razı degil. Bundan ğayrı, Rusiye sanktsiyalarnıñ lâğu etilmesinen bağlı "tam" malümat istey ve Ğarpta buzlatılğan Rusiye aktivleri meselesini añlamaq istey, dep yaza Bloomberg.
Ukrayina prezidenti Volodımır Zelenskıy Kyiv ve Washington arasında azırlanğan 20 maddelik bu plannı "cenkni bitirüvnen bağlı temel vesiqa" dep adlandırdı. Onıñ aytqanına köre, planda Ukrayina qaviy telükesizlik kefaletlerini alır, Ukrayina Silâlı quvetleriniñ sayısı barışıq vaqtında 800 biñ kişi olur, dep közde tuta.
Rusiye akimiyetiniñ vekilleri bu plannı resmiy şekilde izaatlamadı.
