Link açıqlığı

Saatnıñ esas haberi

Rusiye: balanı tiz çökip, topraqnı öpmege zorlağan oca işten boşatılacaq


Balanı topraqnı öpmege zorlağan Krasnodardaki «Zvezdoçka» bala bağçasınıñ müdiri işten boşatılacaq. Bu aqta şeerniñ tasil departamentiniñ müdiri Aleksey Nekrasov «Kubanskiye novosti» Rusiye neşirine bildirdi, dep haber ete Azatlıq Radiosınıñ rus bürosı.

Nekrasovnıñ aytqanına köre, oca eñ yaqın iş künleri işten boşatılacaq. O, departament ana-babalarnıñ uquq qoruyıcı organlarına berecek er angi qabaatlavlarğa qoltutacaq, dep bildirdi.

«Müdirniñ areketleri çirkin, balanı tek maneviy degil, beden basqığa da oğratıp aşaladı. Bundan ğayrı, diger balalarnı da aşalay», – dedi memur.

Tünevin YouTubeda peyda olğan videoda bala bağçasınıñ müdiri balanı tizge oturtıp, başını topraqqa sıqa ve, aytqanına köre, oğlan Rusiyeni sevmegeni içün onı topraqnı öpmege mecbur ete. Oğlannı bir qaç kere aqaretley. «Tiz çök, pislik! Seni aşatqan ve içirgen topraqnı öp!», – dep qıçıra edi oca. O, onıñ fikirince, balalarnı yañlış terbiye etken diger ocalarğa vatanperver olmağanları içün «ayvanlar» dep ayta.

Bala bağçasınıñ müdiri yapqanlarını izaatlap, cezalağan bala «qıyın» ve «Rusiyeden nefret etkenini» ayttı, dep bildirdi.

Rusiye politsiyası adiseni ögrenmek içün teşkerüv keçire. Rusiye Devlet dumasınıñ Krasnodar ülkesi deputatı Svetlana Bessarab prokuraturağa muracaat etip, müdirniñ areketlerini vahşiy ve orta asırlıq dep adlandırdı. Ülkeniñ insan aqları vekâletlisi Tatyana Kovaleva da iş tahqiqatını keçirecek.

2018 senesi fevral ayında Volgograd vilâyetiniñ Mihaylovka şeerinde «vatanperverlik aktsiyası» keçirilgen edi. Bala bağçasınıñ talebelerini tizge oturtıp, Stalingrad uruşında sovet ordusı ğalebe qazanğanınıñ yübileyi munasebetinen «75» raqamı yapıldı.

XS
SM
MD
LG