Rusiye ordusı noyabrniñ 17-ne keçer gecesi Harkiv vilâyetindeki Balakliya şeerine raketa darbesini endirdi. Bu aqta şeerniñ arbiy memuriyet yolbaşçısı Vitaliy Karabanov ve Harkiv vilâyetiniñ memuriyet yolbaşçısı Oleg Sinegubov bildirdiler.
Devlet fevqulâde vaziyetler hızmetiniñ malümatına köre, üç kişi elâk oldı, daa 13 insan yaralandı, olarnıñ arasında dört bala bar.
Daa evel elâk olğan bir kişi ve yaralanğan sekiz kişi aqqında belli edi.
Hızmetniñ qayd etkenine köre, raketalar mesken kvartalğa ücüm etti. Neticede mustaqil ev, çoq qatlı binalarnıñ daire balkonları ve yengil maşinalar yandı, 9 ve 5 qatlı mesken evler, bala bağçası ve yengil maşinalar zarar kördi. Bütün yanğınlarnı qurtarıcılar tez söndürdi.
Rusiye arbiyleri çeşit silâ qullanıp, muntazam sürette Ukrayina regionlarına ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastruktursına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini ayta.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.