Donetsk vilâyetindeki Bahmut rayonınıñ vaziyeti «pek kergin» ola, dep bildirdi Ukrayına Silâlı quvetleriniñ Qara quvetleri komandanı general-polkovnik Oleksandr Sırskıy.
«Büyük ğayıplarğa baqmadan, duşman ücümge eñ çoq azırlanğan «ÇVK Vagner» ücüm otrâdlarını attı, olar ordumıznıñ mudafaasını keçmege ve şeerni sarıp almağa tırışa. Bahmut uruşlarında askerlerimiz metanet, cesürlik ve qaramanlıq köstere», – dep bildire Sırskıynıñ aytqanlarını Ukrayına Silâlı quvetleri Qara ordularınıñ matbuat hızmeti.
Bahmut yönelişinde kerginleşken vaziyet aqqında Ukrayına prezidenti Volodımır Zelenskıy de aytqan edi.
Bahmut cebeniñ esas sıcaq noqtası olıp qala. Rusiye ordusı 2022 senesi iyül ayından berli, qomşu Lugansk vilâyetiniñ büyük qısmını (Severodonetsk, Rubejne, Lısıçansk) işğal etkende, şeerni zapt etmege tırışa. Yanvar ayında Bahmutqa yaqın mevzilerden Rusiye arbiyleri ve yalçıları faal ücüm başlattı. Arbiy talilciler aman-aman bütünley yoq etilgen Bahmutnıñ zapt etilüvi Rusiye ise timsaliy bir emiyet taşıy, amma strategik ceetten müim degil, dep ayta.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
