Rusiye ordusı baarde işğal etilgen Ukrayına topraqlarından yañıdan ücüm başlata bile. Bu aqta Ukrayına mudafaa naziri Oleksiy Reznikov BBC içün bergen intervyüsında ayttı.
Onıñ bildirgenine köre, Rusiye Federatsiyası Ukrayınanıñ cenübi ve şarqında işğal etken rayonlardan ücüm etmek içün küç, bomba ve silâ toplamağa tırışa bile.
«Baar – eki taraf içün areketni yañıdan başlatmaq içün eñ yahşı vaqıt. Başlamağa azır olğanlarını añlap, başlamağa azır olmalımız», – dedi nazir.
Reznikov, Rusiye Beyazrusiyeden tekrar ücüm azırlaycağından şübhele. Onıñ fikirince, şimalden keçüv «çoq vaqıt alacaq ve o qadar (RF – QA) resursları yoq».
Yanvarniñ 10-nda Pentagon Beyazrusiye ordusınıñ Ukrayınağa qarşı istilâda doğrudan iştirak etmege azırlanğanınıñ alâmetleri yoq, dep bildirdi.
Ukrayına milliy telükesizlik ve mudafaa şurasınıñ kâtibi Öleksiy Danilovnıñ aytqanına köre, Rusiye fevral ayında vaziyetni kerginleştirmege azırlanğanınıñ alâmetleri bar.
Beyazrusiye muhalifetiniñ liderlerinden biri Pavel Latuşko Beyazrusiye akimiyeti eñ yaqın vaqıtta Ukrayınağa qarşı cenkte Rusiyege arbiy yardım köstermek içün seferberlik başlata bile, dep bildirdi. Onıñ aytqanına köre, seferberlik içün er şey azır.
Lukaşenko yolbaşçılığında Beyazrusiye reberli Rusiyeniñ esas ittifaqdaşlarından biri ola, onıñ ordusı bıltır fevral ayında Ukrayınağa ücüm etti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
